کراچی ڈیفنس ہاؤسنگ اتھارٹی میں معروف اداکارہ اور ماڈل حمیرا اصغر علی کی لاش برآمد:
کراچی کے ڈیفنس ہاؤسنگ اتھارٹی میں واقع ایک فلیٹ سے معروف اداکارہ اور ماڈل 32 سالہ حمیرا اصغر علی کی لاش ملی ہے۔
گزری تھانے کی پولیس نے تصدیق کی ہے کہ اداکارہ کی لاش تقریبا دو ہفتے پرانی ہے۔
پولیس کے مطابق،
حمیرا اصغر علی 2018 سے اس فلیٹ میں اکیلی رہ رہی تھیں اور 2024 سے انہوں نے کرایہ ادا نہیں کیا تھا۔
اس وجہ سے فلیٹ کے مالک نے ان کے خلاف مقدمہ درج کر رکھا تھا۔
آج بیلف فلیٹ خالی کروانے پہنچا، جس پر دروازہ کھٹکھٹایا گیا، مگر اندر سے کوئی جواب نہ آیا۔
تلاشی کے دوران، تالا توڑ کر فلیٹ کے اندر داخل ہوئے تو وہاں اداکارہ کی لاش پڑی ہوئی ملی۔
ابتدائی تفتیش میں موت کی وجہ کا تعین نہیں ہو سکا۔
لاش کو قانونی کارروائی کے لیے جناح اسپتال منتقل کر دیا گیا ہے جبکہ تاحال کوئی ورثا سامنے نہیں آئے ہیں۔
پولیس سرجن ڈاکٹر سمیہ سید کا کہنا ہے کہ لاش شدید سڑنے کے مرحلے میں ہے،
مگر حیرت انگیز طور پر فلیٹ اور اطراف کے علاقے میں کسی کو بھی لاش کی بو محسوس نہیں ہوئی۔
پولیس کا کہنا ہے کہ کرائم سین یونٹ نے جائے وقوعہ سے شواہد جمع کر لیے ہیں اور تحقیقات جاری ہیں۔
علاقہ مکینوں کا کہنا ہے کہ حمیرا اصغر علی ماڈلنگ کے ساتھ ساتھ اداکاری بھی کرتی تھیں،
اور اس فلیٹ میں کرائے پر رہتی تھیں۔ وہ فٹنس ٹرینر کے طور پر بھی معروف تھیں اور مختلف
مارننگ شوز میں ٹپس دیتی تھیں۔ انہوں نے ایک رئیلیٹی شو میں بھی کام کیا اور چند چھوٹے کردار ادا کیے تھے۔