کراچی میں شہری سیلاب، شوبز شخصیات کا حکومتی غفلت پر سخت ردعمل
کراچی بارشوں کے بعد زیرِ آب، شوبز شخصیات کا حکومت پر شدید ردعمل!
کراچی میں حالیہ شدید بارشوں کے نتیجے میں شہر کے کئی علاقے شہری سیلاب کی لپیٹ میں آگئے،
جس پر شوبز انڈسٹری سے وابستہ افراد نے شدید تشویش کا اظہار کیا ہے۔
سوشل میڈیا پر بارش سے متاثرہ مناظر کی تصاویر اور ویڈیوز تیزی سے وائرل ہو رہی ہیں،
جن پر فنکاروں نے حکومت کی نااہلی اور ناقص منصوبہ بندی کو آڑے ہاتھوں لیا ہے۔
سماجی کارکن ذوالفقار علی بھٹو جونیئر نے اس صورتحال پر تبصرہ کرتے ہوئے کہا کہ
کراچی اپنی قدرتی جغرافیائی ساخت کے باعث حساس ہے،
لیکن حکومتی بے حسی اور بدعنوانی نے حالات کو بدترین بنا دیا ہے۔
ان کے مطابق، ٹھیکیدار صرف پیسہ بنا کر رفوچکر ہو جاتے ہیں،
جبکہ انفراسٹرکچر کی بہتری کے لیے کوئی سنجیدہ اقدام نہیں اٹھایا جاتا۔
اداکارہ ماورا حسین نے شہر کی حالتِ زار پر افسوس ظاہر کرتے ہوئے کہا کہ
لاکھوں لوگوں کا سہارا بننے والا کراچی ایک بار پھر پانی میں ڈوب رہا ہے اور یہ پہلا موقع نہیں ہے۔
ریپر طلحہ انجم نے سندھ حکومت پر طنز کرتے ہوئے لکھا کہ
اجرک نمبر پلیٹس شاید اب شہریوں کو بچانے کا کام کریں گی۔
اداکارہ صنم سعید نے براہِ راست حکومت سے سوالات کیے،
جبکہ ایمن خان نے حیرت کا اظہار کرتے ہوئے پوچھا کہ ہماری حکومت آخر کر کیا رہی ہے؟
شوبز شخصیات کا کہنا ہے کہ اگرچہ موسمیاتی تبدیلی ایک حقیقت ہے،
لیکن یہ دہائیوں کی غفلت کا جواز نہیں بن سکتی۔ جب تک حکومت شہری سیلاب کو اپنی ناکامی
نہیں مانتی، کراچی کے شہری یوں ہی قربانیاں دیتے رہیں گے۔
