کراچی: گزشتہ 24 گھنٹوں کے دوران کوروناوائرس کے مزید 21 مریض فوت ہوگئے جبکہ ہلاکتوں کی تعداد 4087 ہوگئی ہے اور 12570 ٹیسٹ کئے گئے جس کے نتیجے میں 605 نئے کیسز سامنے آئے۔
یہ بات وزیراعلیٰ سندھ سید مراد علی شاہ نے ہفتہ کو وزیراعلیٰ ہاؤس سے جاری ایک بیان میں کہی۔ انہوں نے مزید کہا کہ کورونا وائرس کے مزید 21 مریض اپنی جان سے ہاتھ دھو بیٹھے جن کے نتیجے میں ہلاکتوں کی تعداد 4087 تک پہنچ گئی ہے جوکہ اموات کی شرح کا 1.6 فیصد ہے۔
وزیر اعلیٰ مراد علی شاہ نے کہا کہ 12570 نمونوں کا ٹیسٹ کیا گیا جس میں سے 605 کیسز کا پتہ چلا جوکہ موجودہ تشخیصی شرح کا 4.8 فیصد ہے۔
انہوں نے مزید کہا کہ اب تک 2791344 ٹیسٹ کرائے گئے ہیں جن کے نتیجے میں 250647 کیسوں کی تشخیص کی گئی ان میں 91 فیصد یعنی 227148 مریض صحتیاب ہوئے جن میں گزشتہ 24 گھنٹوں کے دوران 396 بھی شامل ہیں۔
وزیراعلیٰ سندھ نے کہا کہ اس وقت 19412 مریض زیر علاج ہیں ان میں سے 18781 گھر وں میں ، 15 آئسولیشن مراکز میں اور 616 مختلف اسپتالوں میں ہیں۔ انہوں نے مزید کہا کہ 616 مریضوں کی حالت تشویشناک بتائی گئی جن میں سے 71 کو وینٹی لیٹرز پر منتقل کیا گیا ہے۔
بیان کے مطابق 605 نئے کیسوں میں سے 341 کا تعلق کراچی سے ہے جن میں ضلع شرقی 152، ضلع جنوبی 82، ضلع وسطی 41، ضلع کورنگی 27، ضلع ملیر 20 اور ضلع غربی 19 شامل ہیں۔
حیدرآباد میں 88، عمرکوٹ 23، بدین 15، جیکب آباد اور سانگھڑ 12-12، شکار پور اور سجاول 10-10، میرپورخاص 9، لاڑکانہ اور ٹھٹھہ 7-7، نوشہروفیروز اور جامشورو 6-6، قمبر 5، گھوٹکی، خیرپور اور شہید بینظیر آباد 4-4، ٹنڈو اللہیار 3 کیسز رپورٹ ہوئے۔
وزیراعلیٰ سندھ سید مراد علی شاہ نے صوبے کے عوام پر زور دیا کہ وہ ایس او پیز پر عمل کریں۔
