سعودی عرب کی فیفا 2034 ورلڈکپ کے تناظر میں شراب پر پابندی ختم کرنے کی افواہوں کی تردید:
سعودی عرب نے فیفا 2034 ورلڈکپ کے حوالے سے شراب پر پابندی ہٹانے کی خبروں کو سختی سے رد کیا ہے۔
عرب میڈیا کے مطابق، ایک اعلیٰ سرکاری عہدیدار نے میڈیا کو بتایا کہ ملک میں 72 سال سے جاری
شراب پر پابندی کو کسی بھی صورت میں ہٹانے کا کوئی ارادہ یا تجویز زیر غور نہیں ہے۔
انہوں نے یہ بھی واضح کیا کہ یہ خبریں من گھڑت اور گمراہ کن ہیں۔ عہدیدار نے مزید کہا کہ مکہ اور
مدینہ جیسے مقدس مقامات پر شراب کی فروخت یا استعمال کا تصور بھی ناقابل قبول ہے اور ایسا ہونا ممکن نہیں ہے۔
یہ افواہ سب سے پہلے ایک غیر معروف وائن بلاگ پر شائع ہوئی تھی،
جس کے بعد بعض بین الاقوامی میڈیا اداروں نے اس خبر کو پھیلانا شروع کیا۔
شراب پر پابندی ہٹانے کی خبر کے منظر عام پر آنے کے بعد سعودی سوشل میڈیا پر شدید ردعمل دیکھا گیا،
جہاں بعض صارفین نے اسے مذہبی اور ثقافتی اقدار کی خلاف ورزی قرار دیا۔
یاد رہے کہ ولی عہد محمد بن سلمان کی قیادت میں سعودی عرب نے حالیہ برسوں میں سماجی اصلاحات
کی ہیں جن میں خواتین کی ڈرائیونگ کا حق، عوامی مقامات پر مرد و خواتین کی علیحدگی میں نرمی،
اور مذہبی پولیس کے اثر و رسوخ میں کمی شامل ہے۔ تاہم، شراب کی فروخت یا کھلے عام استعمال کی
اجازت ابھی بھی نہیں ہے اور یہ پابندی بدستور برقرار ہے۔
