کراچی: پاکستان ٹیلی وژن کے ڈائریکٹر اسپورٹس نعمان نیاز لائیو پروگرام میں لیجنڈ فاسٹ بالر شعیب اختر پر بھڑک اٹھے۔ لائیو شو کے دوران نعمان نیاز نے شعیب اختر سے تلخ کلامی کی۔
جس پر اسٹار فاسٹ بالر شعیب اختر نے لائیو شو میں لیجنڈ کرکٹرز کی موجودگی عوام سے معذرت کرتے ہویے میں استعفیٰ دینے کا اعلان کیا اور شو سے اٹھ کر چلے گئے۔
تفصیلات کے مطابق نعمان نیاز نے پروگرام کے دوران لیجنڈ کرکٹر شعیب اختر کو گفتگو کے دوران ٹوکا اور ہتک آمیز رویہ اختیار کرتے ہوئے کہا کہ زیادہ چالاک نہ بنیں، اگر انہوں نے ایسا ہی رویہ اختیار کرنا ہے تو وہ پروگرام چھوڑ کر چلے جائیں۔
یہ افسوسناک واقعہ پی ٹی وی اسپورٹس پر پاکستان بامقابلہ نیوزی لینڈ ہونے والے میچ کے حوالے سے سرکاری چینل پر لائیو پروگرام میں پیش آیا۔ خیال رہے کہ ٹی ٹونٹی ورلڈ کپ 2021 کرکٹ تجزیے کیلئے پاکستان نے ویوین رچرڈز سمیت دیگر بین الاقوامی کھلاڑیوں کو مدعو کیا جو پروگرام کے دوران اپنا تجربہ شیئر کرتے ہیں۔
اس لائیو پروگرام میں ویوین رچرڈز، ڈیوڈ گاور، ثنا میر، عاقب جاوید ودیگر شریک تھے۔ پروگرام کے دوران شعیب اختر نیوزی لینڈ کیخلاف میچ میں حارث رؤف کی کارکردگی پر بات کر رہے تھے۔۔
اس موقع پر نعمان نیاز نے شعیب اختر کو بات جاری نہ رکھنے دی اور ٹوکتے ہوئے کہا کہ شاہین شاہ آفریدی تو انڈر 19 کھیل چکے ہیں۔ تاہم شعیب اختر نے انھیں بتایا کہ میں حارث رؤف کے بارے میں بات کر رہا ہوں۔ انہوں نے بظاہر نعمان نیاز پر طنز کرتے ہوئے کہا کہ کوئی ایک بندہ ہے جو یہاں پروگرام میں تیاری کیساتھ آیا ہوا ہے۔
شعیب اختر کی یہ بات سنتے ہی نعمان نیاز بھڑک اٹھے اور کہا کہ انھیں تلخ لہجہ اختیار کرنے اور زیادہ چالاک بننے کی ضرورت نہیں ہے۔ اگر وہ ایسا ہی رویہ جاری رکھنا چاہتے ہیں تو وہ پروگرام چھوڑ کر جا سکتے ہیں۔
نعمان نیاز نے اپنی بات دہراتے ہوئے کہا کہ میں یہ بات لائیو پروگرام میں شعیب اختر سے کہہ رہا ہوں۔ پی ٹی وی اسپورٹس ڈائریکٹر کی بات سنتے ہی شعیب اختر نے ان سے کہا کہ میں کچھ کہنا چاہتا ہوں لیکن نعمان نیاز نے انھیں موقع نہیں دیا اور پرڈیوسر سے کہا کہ وہ بریک لے۔
اس واقع کے بعد سوشل میڈیا پر نعمان نیاز کے خلاف شعیب اختر کے پرستار میدان میں آگئے اور پروگرام اینکر کو شدید ترین تنقید کا نشانہ بنایا۔
شعیب اختر نے اپنے سوشل میڈیا پر ویڈیو پیغام میں اس واقع سے متعلق اپنا موقف سامنے لائے جبکہ #ShoaibAkhtar سوشل میڈیا پر ٹاپ ٹرینڈ بنا ہوا ہے، اس حوالے سے حکومتی وزرا اور سیاسی شخصیات، شوبر ستارے اور کرکٹ میں دلچسپی رکھنے والوں کی بڑی تعداد نے حکومت سے فوری طور پر نعمان نیاز کو عہدے سے ہٹاتے ہوئے بلیک لسٹ کرنے کا مطالبہ کردیا۔
سوشل میڈیا پر جنگل کی طرح پھیلنے اس خبر پر پی ٹی وی انتظامیہ نے نوٹس لے لیا ہے اور اس واقع کا جائزہ لینے کے لیے کمیٹی قائم کردی ہے۔
