کینیڈا اسرائیل کی بجائے فلسطین کو تسلیم کرنے کا اعلان، عالمی سطح پر تنقید اور ردعمل!
کینیڈا کے وزیراعظم مارک کارنی نے بدھ کے روز اعلان کیا ہے کہ ان کا ملک اقوامِ متحدہ کے ستمبر
میں ہونے والے اجلاس میں فلسطین کی ریاست کو تسلیم کرے گا۔
یہ فیصلہ اس وقت سامنے آیا ہے جب غزہ میں قحط کی صورتحال تیزی سے بگڑ رہی ہے
اور عالمی سطح پر اسرائیل پر دباؤ میں اضافہ ہو رہا ہے۔ مارک کارنی کا کہنا تھا کہ غزہ میں جاری
حالات، خاص طور پر انسانی بحران اور قحط سے اموات، اس بات کا ثبوت ہیں کہ
فلسطینی ریاست کے قیام کو خطرات لاحق ہیں۔
انہوں نے یہ بھی واضح کیا کہ کینیڈا اس
انسانی بحران کو بڑھانے والی اسرائیلی حکومت کی پالیسی کی مذمت کرتا ہے۔
انہوں نے یہ بھی بتایا کہ یہ فیصلہ فلسطینی اتھارٹی کی جانب سے اصلاحات کے وعدے اور 2026
میں عام انتخابات کروانے کے وعدے کے بعد کیا گیا ہے، جن میں حماس کا کوئی کردار شامل نہیں ہوگا۔
ماضی میں فرانس اور برطانیہ نے بھی فلسطین کو تسلیم کرنے کے امکانات کا اشارہ دیا تھا،
مگر شرط یہ رکھی گئی ہے کہ ستمبر تک غزہ میں جنگ بندی ہو جائے۔ یہ اعلانات ایسے وقت میں
سامنے آئے ہیں جب اسرائیل کے قریبی اتحادیوں میں انسانی بحران کے حوالے سے تشویش بڑھتی جا رہی ہے۔
دوسری جانب، اسرائیل اور امریکہ نے اس اعلان کو مسترد کرتے ہوئے اسے حماس کو انعام دینے کے
مترادف قرار دیا ہے اور جنگ بندی کی کوششوں کو نقصان پہنچنے کا خدشہ ظاہر کیا ہے۔
غزہ میں خوراک کا شدید بحران ہے اور بچوں سمیت درجنوں افراد بھوک سے جان بحق ہو چکے ہیں۔
اقوامِ متحدہ کا کہنا ہے کہ اگر فوری امداد فراہم نہیں کی گئی تو قحط ناگزیر ہو جائے گا۔
اس جنگ میں اب تک غزہ میں 60,000 سے زائد افراد ہلاک ہو چکے ہیں،
جب کہ اسرائیلی اعداد و شمار کے مطابق 7 اکتوبر کے حملوں میں 1,200 افراد مارے گئے تھے۔
