اسلام آباد: بچوں کے ’ب‘ فارم کے حوالے سے والدین کے لئے خبر یہ ہے کہ اب نئے فیچرز کے ساتھ خصوصی ب فارم بنوانا ہوگا۔
تفصیلات کے مطابق، نادرا نے پہلی مرتبہ 10 سال سے زائد عمر کے بچوں کے لئے خصوصی سیکیورٹی کے فیچرز کے ساتھ نیا بی فارم متعارف کرنے کا فیصلہ کیا ہے۔
خصوصی بی فارم (رجسٹریشن سرٹیفیکیٹ) کا اجراء کب سے؟
وزارت داخلہ کے ترجمان نے یہ اعلان کیا کہ خصوصی بی فارم (رجسٹریشن سرٹیفیکیٹ) کا اجراء 15 جنوری سے مرحلہ وار شروع کیا جائے گا۔
ترجمان نے مزید بتایا کہ یہ اقدام بچوں کی شناختی معلومات کی چوری اور غلط استعمال کو روکنے میں مددگار ثابت ہوگا، اور یہ جعلی شناختی کارڈز، غیر قانونی پاسپورٹس، اور انسانی سمگلنگ کے خلاف مؤثر ثابت ہوگا۔
خصوصی بے فارم میں نیا کیا ہے؟
10 سال سے زیادہ عمر کے بچوں کے لئے انگلیوں کے نشانات اور تصویر کا (ب) فارم کا حصہ بنانا ضروری قرار دے دیا گیا ہے۔
جنوری سے نادرا سینٹر پر بچوں کے انگلیوں کے نشانات اور تصاویر متعلقہ قانون کے مطابق لی جائیں گی، لیکن اس عمل میں بچے کے ساتھ ایک قانونی سرپرست کی موجودگی شرط ہے۔
نادرا کے ترجمان کے مطابق، کارآمد کمپیوٹرائزڈ شناختی کارڈ اور بچے کا کمپیوٹرائزڈ پیدائش سرٹیفکیٹ پیش کرنا بھی لازمی ہوگا۔
نادرا میں مطلوبہ کارروائی مکمل کرنے کے بعد بچے کے لئے (ب) فارم جاری کیا جائے گا جس میں تصویر شامل ہوگی۔
نئے پاسپورٹ کی درخواست دینے کے لئے نادرا سے حاصل کردہ تصویر والے (ب) فارم کی پیشکش کرنا ہوگی، اور پرانا (ب) فارم جو بغیر تصویر اور انگلیوں کے نشانات کے ہے، قبول نہیں کیا جائے گا۔
10 سال سے زائد عمر کے بچوں کے لئے تصویر اور انگلیوں کے نشانات کے ساتھ نیا (ب) فارم بنوانا لازمی ہے، جبکہ آئندہ مراحل میں مزید تبدیلیاں بھی متعارف کرائی جائیں گی۔
یونین کونسل میں شہریوں کے لیے آنکھوں کے نشانات، تصویریں اور انگلیوں کے نشانات کی سہولت فراہم کی جائے گی۔ اس کے ساتھ ساتھ، نادرا کے شناختی نظام کو صوبوں کے سول رجسٹریشن مینجمنٹ سسٹم کے ساتھ مدغم کرنے کے اقدامات بھی کیے جائیں گے۔
پاک آئی ڈی موبائل ایپ کی خدمات کو مزید بہتر بنانے کے لئے نئے اقدامات تجویز کیے جائیں گے، تاکہ تمام پاکستانی شہریوں کو ڈیجیٹل شناختی کارڈ کی سہولت فراہم کی جا سکے۔
تازہ ترین اپڈیٹس کے لیے ڈے نیوز کو گوگل نیوز، انسٹاگرام، یوٹیوب، فیس بک، واٹس ایپ اور ٹک ٹاک پر فالو کریں۔
