بینک اکاؤنٹس کی معطلی کا نیا طریقہ کار 1 جولائی 2025 سے نافذ ہوگا:
وفاقی حکومت نے فنانس بل 2025-26 کے ذریعے سیلز ٹیکس قانون میں اہم تبدیلیاں کی ہیں،
جن کے مطابق اب غیر رجسٹرڈ سیلز ٹیکس دہندگان کے بینک اکاؤنٹس کو معطل کرنے کا عمل زیادہ شفاف اور آسان بنا دیا گیا ہے۔
یہ ترمیم یکم جولائی 2025 سے لاگو ہوگی اور اس کا مقصد ایسے افراد کے لیے جو
سیلز ٹیکس رجسٹریشن حاصل کرنے کے لیے تیار نہیں، ایک مؤثر سزا فراہم کرنا ہے۔
نئے قانون کے مطابق، اگر کمشنر کو یقین ہو کہ کوئی شخص بغیر رجسٹریشن کے قابلِ ٹیکس اشیاء کی
فراہمی میں ملوث ہے، تو وہ اس شخص کو تین مرتبہ مسلسل سننے کا موقع فراہم کرے گا تاکہ وہ رجسٹریشن حاصل کرنے کی کوشش کرے۔
اگر وہ شخص رجسٹریشن حاصل کرنے میں ناکام رہتا ہے، تو کمشنر کو یہ اختیار دیا جائے گا کہ وہ
تحریری حکم کے ذریعے بینک، شیڈول بینک یا دیگر مالیاتی اداروں کو ہدایت دے کہ وہ اس شخص کا بینک اکاؤنٹ تین دن کے لیے معطل کر دیں۔
مزید برآں، اس معطلی کو کمشنر دو اور بار دہرا سکتا ہے، ہر بار معطلی کے درمیان ایک ہفتے کا وقفہ رکھتے ہوئے۔
اس ترمیم کا مقصد غیر رجسٹرڈ سیلز ٹیکس دہندگان کے خلاف کارروائی کو زیادہ موثر بنانا اور ان کے خلاف سخت اقدامات کو یقینی بنانا ہے۔
