گلگت بلتستان: تربیتی ہیلی کاپٹر کا حادثہ، پانچ شہید!

پیر کے روز گلگت بلتستان کے ضلع دیامر میں پاک فوج کا ایک تربیتی ہیلی کاپٹر گر کر تباہ ہو گیا،

جس کے نتیجے میں پانچ فوجی شہید ہوگئے ہیں، جن میں سے دو میجرز بھی شامل ہیں۔

فوج کے شعبہ تعلقات عامہ (آئی ایس پی آر) کے مطابق یہ واقعہ ایم آئی-17 ہیلی کاپٹر کے ساتھ پیش آیا،

جو ہدور گاؤں کے قریب ٹھکداس چھاؤنی سے تقریباً 12 کلومیٹر کے فاصلے پر تھا۔

بیان میں بتایا گیا ہے کہ ہیلی کاپٹر معمول کی تربیتی پرواز پر تھا کہ اس میں تکنیکی خرابی پیدا ہوئی اور

یہ گر کر تباہ ہو گیا۔ اس حادثے میں تمام عملہ موقع پر ہی شہید ہو گیا۔

آئی ایس پی آر کے مطابق، شہداء میں

– میجر عاطف (پائلٹ اِن کمانڈ)
– میجر فیصل (کو پائلٹ)
– نائب صوبیدار مقبول (فلائٹ انجینئر)
– حوالدار جہانگیر (کریو چیف)
– نائیک عامر (کریو چیف) شامل ہیں۔

حکام کا کہنا ہے کہ حادثے کی وجوہات کا تعین کرنے کے لیے تحقیقات شروع کر دی گئی ہیں۔

سینئر پولیس افسر عبدالحمید کے مطابق، یہ واقعہ اس وقت پیش آیا جب ہیلی کاپٹر ایک نئے مجوزہ

ہیلی پیڈ پر آزمائشی لینڈنگ کر رہا تھا، کہ اچانک گر کر تباہ ہوگیا۔

انہوں نے بتایا کہ مرنے والوں میں دو پائلٹ اور تین ٹیکنیشن شامل تھے،

اور یہ واقعہ صبح تقریباً 10 بجے پیش آیا۔ ہیلی کاپٹر گلگت بلتستان حکومت کی ملکیت تھا۔

یہ واقعہ تربیتی مشنوں اور فوج کی معمول کی سرگرمیوں کا حصہ تھا،

جن کا مقصد ہر قسم کے آپریشنز اور قدرتی آفات کے دوران امدادی کارروائیوں کے لیے تیار رہنا ہے۔

تازہ ترین اپڈیٹس کے لیے ڈے نیوز کو گوگل نیوز، انسٹاگرام، یوٹیوب، فیس بک، واٹس ایپ اور ٹک ٹاک پر فالو کریں۔