شاہ رخ خان کا 33 سالہ انتظار ختم، پہلی بار نیشنل فلم ایوارڈ مل گیا
شاہ رخ خان کو نیشنل فلم ایوارڈ سے نوازا گیا!
تین دہائیوں بعد ان کی اداکاری کا اعتراف:
بالآخر بالی وڈ کے معروف اور مقبول ترین اداکار، جنہیں اکثر "شہنشاہِ فلم” کہا جاتا ہے،
شاہ رخ خان کو ان کی شاندار اداکاری کے اعتراف میں نیشنل فلم ایوارڈ سے نوازا گیا ہے۔
یہ اعزاز انہیں 2023 میں ریلیز ہونے والی فلم ’جوان‘ میں بہترین اداکاری پر دیا گیا ہے،
جو بھارت کے 71ویں نیشنل فلم ایوارڈز کے دوران اعلان کیا گیا۔
شاہ رخ خان نے 1992 میں فلم ’دیوانہ‘ سے اپنی فلمی سفر کا آغاز کیا تھا، اور جلد ہی وہ بالی وڈ کے
سب سے پسندیدہ اداکاروں میں شامل ہو گئے۔
ان کی فلموں جیسے ’دل والے دلہنیا لے جائیں گے‘، ’چک دے انڈیا‘، اور ’کچھ کچھ ہوتا ہے‘ نے نہ صرف
بھارت میں بلکہ دنیا بھر میں شہرت حاصل کی۔ اگرچہ انہیں انٹرنیشنل سطح پر متعدد ایوارڈز مل
چکے ہیں، مگر بھارت کے سب سے بڑے فلمی اعزاز یعنی ’نیشنل ایوارڈ‘ سے وہ اب تک محروم تھے۔
مگر اب یہ دیرینہ انتظار ختم ہوا ہے۔ بھارتی میڈیا کے مطابق، ’جوان‘ میں ان کی بہترین اداکاری پر انہیں
یہ اعزاز دیا گیا ہے، اور یہ ایوارڈ وکرانت میسی کے ساتھ مشترکہ طور پر دیا گیا ہے،
جنہوں نے فلم ’بارہویں فیل‘ میں اپنی اداکاری سے سب کو متاثر کیا تھا۔
اس تقریب میں معروف اداکارہ رانی مکھرجی کو بھی ان کی فلم ’مسز چیٹرجی‘ میں بہترین اداکاری کے
لیے نیشنل ایوارڈ دیا گیا۔ شاہ رخ خان نے اس کامیابی پر اپنی انسٹاگرام اسٹوری پر ایک
ویڈیو شیئر کی، جس میں ان کے چہرے پر خوشی اور فخر واضح تھا۔
ویڈیو میں انہوں نے حکومتِ بھارت اور اپنے مداحوں کا دل سے شکریہ ادا کیا۔
یاد رہے کہ ’جوان‘ میں شاہ رخ خان نے ڈبل کردار ادا کیا تھا،
اور فلم میں انہوں نے سات مختلف روپ اپنائے، جو ان کی فنی صلاحیت کا منہ بولتا ثبوت ہے۔
33 سال کے طویل انتظار کے بعد یہ ایوارڈ نہ صرف شاہ رخ خان کے لیے اہمیت رکھتا ہے بلکہ ان تمام
مداحوں کے لیے بھی ایک خوشی کا لمحہ ہے، جو برسوں سے اس دن کا انتظار کر رہے تھے۔
