سوشل میڈیا اسٹار عبدو روزِق کی دبئی ایئرپورٹ پر گرفتاری و رہائی
عبدالوہاب روزِق کو دبئی ایئرپورٹ پر حراست کے بعد رہا کیا گیا، بیرون ملک سفر پر پابندی عائد:
دبئی انٹرنیشنل ایئرپورٹ پر ہفتہ کو معروف تاجک گلوکار اور سوشل میڈیا اسٹار عبدو روزِق کو
حراست میں لیے جانے کے بعد، گزشتہ روز انہیں رہا کر دیا گیا ہے۔
خلیج ٹائمز کی رپورٹ کے مطابق 21 سالہ عبدو روزِق نے چند گھنٹوں بعد انسٹاگرام پر ایک ویڈیو پوسٹ کی،
جس میں وہ 12 جولائی کو دبئی کے حیات ریجنسی میں واقع دبئی کریک ہائٹس ہوٹل میں منعقدہ
انڈیا انٹرنیشنل انفلوئنسرز ایوارڈز (آئی آئی آئی اے) میں ایوارڈ وصول کرتے ہوئے نظر آ رہے ہیں۔
اس ویڈیو میں گرفتاری یا حراست کا کوئی ذکر نہیں کیا گیا۔ ذرائع کے مطابق،
عبدو روزِق کو مونٹی نیگرو سے دبئی پہنچنے کے فوراً بعد ایئرپورٹ پر حراست میں لیا گیا۔
ایک مبینہ شکایت کنندہ کے مطابق، انہیں ضمانت پر رہا کیا گیا ہے، مگر ان کے بیرون ملک سفر پر پابندی عائد ہے۔
سرکاری ذرائع سے اس معلومات کی تصدیق ابھی تک نہیں ہو سکی۔
دبئی میڈیا آفس نے اس معاملے پر تبصرہ کرنے سے انکار کیا ہے،
جبکہ پولیس کی جانب سے بھی اتوار کی دوپہر تک کوئی سرکاری بیان جاری نہیں ہوا ہے۔
عبدو روزِق کا قد محض 3 فٹ سے کچھ زیادہ ہے، اور وہ خلیجی خطے کے معروف ترین نوجوان فنکاروں میں
شمار ہوتے ہیں۔ وہ یو اے ای کا گولڈن ویزا رکھتے ہیں اور دبئی میں کئی سالوں سے قیام پذیر ہیں۔
انہوں نے موسیقی، وائرل ویڈیوز، اور رئیلٹی شو بگ باس 16 میں شرکت سے مقبولیت حاصل کی۔
سال 2024 میں انہوں نے دبئی کے کوکا کولا ایرینا میں اپنا پہلا باکسنگ مقابلہ لڑا اور برطانیہ میں
اپنے ریستوران حبیبی کا آغاز بھی کیا۔ اسی سال، انہیں بھارت میں منی لانڈرنگ کے ایک کیس میں
انٹیلی جنس ایجنسی کے ذریعے پوچھ گچھ کے لیے طلب کیا گیا، مگر انہیں ملزم قرار نہیں دیا گیا۔
