ڈبلیو ایچ او کا انتباہ: چکن گونیا وائرس کی عالمی وبا کا خطرہ بڑھ رہا ہے:
عالمی ادارہ صحت (ڈبلیو ایچ او) نے خبردار کیا ہے کہ چکن گونیا وائرس کی ایک بڑے پیمانے پر عالمی وبا پھوٹنے کا امکان ہے،
اور اس سے بچاؤ کے لیے فوری اقدامات ضروری ہیں۔ خبر رساں ادارہ ’اے ایف پی‘ کے مطابق،
ڈبلیو ایچ او کا کہنا ہے کہ حالیہ علامات وہی ہیں جو بیس سال قبل ایک بڑے وبائی مرض سے پہلے
دیکھی گئی تھیں، اور ادارہ اس مرتبہ کسی بھی صورت میں اس صورتحال کو دوبارہ دہرانا نہیں چاہتا۔
چکن گونیا ایک مچھر کے ذریعے پھیلنے والا وائرس ہے، جس کی علامات میں بخار اور انتہائی تکلیف دہ جوڑوں کا درد شامل ہے۔
بعض حالتوں میں یہ بیماری مہلک بھی ثابت ہو سکتی ہے۔
ڈبلیو ایچ او کی ماہر ڈاکٹر ڈیانا روہاس الواریز نے بتایا کہ یہ مرض لوگوں میں اتنا معروف نہیں،
مگر اب تک دنیا کے 119 ممالک میں پایا جا چکا ہے، اور تقریباً 5.6 ارب افراد اس سے خطرے میں ہیں۔
انہوں نے یاد دلایا کہ 2004 سے 2005 کے دوران بحر ہند کے جزیروں پر قابض وبا کے نتیجے میں دنیا
بھر میں 5 لاکھ سے زائد افراد اس وائرس سے متاثر ہوئے تھے۔ جنیوا میں پریس بریفنگ کے دوران،
انہوں نے بتایا کہ موجودہ حالات بھی اسی پیٹرن کی نشاندہی کر رہے ہیں،
اور 2025 کے آغاز سے ہی ری یونین، مایوٹ اور ماریشس میں بڑے پیمانے پر چکن گونیا وبائیں رپورٹ ہوئی ہیں۔
ری یونین کی ایک تہائی آبادی کے اس وائرس سے متاثر ہونے کا بھی خدشہ ظاہر کیا گیا ہے۔
ڈبلیو ایچ او کے مطابق،
چکن گونیا کی علامات ڈینگی اور زیکا وائرس جیسی ہیں، اس لیے ان کی تشخیص مشکل بھی ہو سکتی ہے۔
ڈاکٹر روہاس الواریز نے مزید بتایا کہ بیس سال قبل کی طرح،
اس بار بھی وائرس علاقائی سطح پر دوسرے ممالک میں پھیل رہا ہے،
جن میں مڈغاسکر، صومالیہ اور کینیا شامل ہیں، اور جنوبی ایشیا میں اس کی منتقلی جاری ہے۔
یورپ میں بھی اس وائرس کے درآمد شدہ کیسز رپورٹ ہوئے ہیں، جن میں فرانس میں مقامی سطح پر
وائرس کی منتقلی کی تصدیق ہو چکی ہے، اور اٹلی میں بھی مشتبہ کیسز سامنے آئے ہیں۔
