کیا جائے گا 19 جولائی کو ملک گیر پہیہ جام ہڑتال، مال بردار ٹرانسپورٹ تنظیموں کا اعلان:
کراچی چیمبر آف کامرس اینڈ انڈسٹری (کے سی سی آئی) نے ملک بھر کی مال بردار ٹرانسپورٹ
تنظیموں کے ساتھ مل کر 19 جولائی کو ملک گیر ہڑتال کا اعلان کیا ہے،
جس کا مقصد فنانس ایکٹ 2025 کے متنازعہ مالی اقدامات کے خلاف احتجاج ریکارڈ کرنا ہے۔
اس ہڑتال کا مقصد حکومت کو ان اقدامات کو فوری طور پر معطل کرنے پر مجبور کرنا ہے،
ورنہ معاشی سرگرمیوں کی مکمل بندش کا خطرہ ہے۔ پیر کو کے سی سی آئی کے اجلاس میں ایک
پریس کانفرنس سے خطاب کرتے ہوئے صدر محمد جاوید بلوانی نے اس بات پر زور دیا کہ
کاروباری برادری ان پانچ اہم نکات اور 32 بے ضابطگیوں کو قطعی طور پر مسترد کرتی ہے،
جنہیں فنانس ایکٹ میں شامل کیا گیا ہے۔ انہوں نے مطالبہ کیا کہ حکومت ان شقوں کو
باقاعدہ نوٹیفکیشن کے ذریعے معطل کرے تاکہ مذاکرات کا راستہ ہموار ہو سکے۔
بلوانی کا کہنا تھا کہ تمام کاروباری اور ٹرانسپورٹ تنظیمیں ایک پیج پر ہیں اور 19 جولائی کو کوئی بھی
گاڑی سڑکوں پر نہیں نکلے گی، کیونکہ یہ صرف ایک ہڑتال نہیں بلکہ اپنی بقاء کی لڑائی ہے۔
انہوں نے فوری طور پر ختم کیے جانے والے اقدامات میں سیلز ٹیکس ایکٹ کی شقیں 37A اور 37B،
ایف بی آر کو بغیر وارنٹ گرفتاری کا اختیار، نقد ادائیگی پر سزا، ڈیجیٹل انوائسنگ کی لازمی شرط،
اور برآمد کنندگان کے لیے فائنل ٹیکس ریجیم کی بحالی شامل قرار دیا۔
بلوانی نے واضح کیا کہ وزارتِ خزانہ نے مذاکرات کی پیشکش کی ہے،
مگر ابھی تک کوئی تحریری یقین دہانی یا باضابطہ نوٹیفکیشن جاری نہیں ہوا۔
انہوں نے کہا کہ جب تک یہ اقدامات معطل نہیں ہوتے، بات چیت یا ہڑتال کو موخر کرنے کا کوئی ارادہ نہیں ہے۔
اس موقع پر پاکستان گڈز ٹرانسپورٹ الائنس اور دیگر متعلقہ تنظیموں کے نمائندوں نے کے سی سی آئی
کے ساتھ مکمل یکجہتی کا اظہار کیا اور کہا کہ 19 جولائی کو ملک بھر میں مال برداری کا نظام مکمل طور پر بند رہے گا۔
